Aita Biert e Men Steiner èn oriundamain da Scuol. El è stà magister e redactur da RTR, ella è magistra da clavazin e terapeuta da musica. Dapi ils onns 1970 han els chantà sco duo e lur emprim concert è sta il 1977 en la Klibühni a Cuira. Lur passiun èn las chanzuns popularas rumantschas, quellas ch'ins chanta gugent da cumpagnia: «Giodim in quella val», «Il bel Bernard», «Saira per saira», «Il silip e la furmia» e bleras autras.
Il 1982 registreschan els il disc «Aita Biert, Men Steiner ed ils Fränzlis da Tschlin: Chanzuns. Lieder und Tänze aus dem Engadin». Sin quel disc vegnan els accumpagnads dals Fränzlis, quella giada cun Domenic, Duri e Curdin Janett, Flurin Caviezel ed Arnold Alder. Da quella furmaziun datti pli tard ils Fränzlis da Tschlin, cun Men Steiner che suna la gìa.
La turnea da cumià
Suenter ch'els han fatg chant e musica durant 50 onns èsi temp da sa retrair dal palc. Perquai hai dà ina turnea da cumià cun concerts a Zuoz, Segl, Valchava e Sent – cun in sguard enavos e blera nostalgia. Il concert final è sta ils 9 da mars en la Giesserei ad Oerlikon, RTR ha registrà e Vus udis quel en l'Artg musical.
