Gia baud ha ella survegnì instrucziun musicala. Ella ha emprendì la violina tar divers magisters. Il sunar clavazin ha ella emprendì a moda autodidactica ed uschia er survegnì gust da cumponer. Ella ha vivì en in temp nua ch'ins ha remartgà las dunnas en la musica sin il pli sco musicistas. Cumponistas han ins chattà da quai temp quasi sulet en claustras da dunnas.
La gronda part da si'ovra cumpositorica è en spezial chant religius (chanzuns e motettas). Contact aveva Martha von Castelberg er cun poets rumantschs sco Alfons Tuor u Carli Fry. Sia simpatia per la cultura da la Surselva sa mussa er en chanzuns profanas che sa basan sin poesias d'auturs rumantschs.