Professer Gion Giusep Derungs è naschì a Surcasti en Lumnezia-Sut, ha fatg la patenta da magister primar e secundar. 1958-64 ha el studegià musica a Basilea, suenter il 1964-97 è el stà magister da musica a la Scola chantunala Cuira. Gion Giusep Derungs è er stà dirigent da plirs chors: il Chor da la Scola chantunala Cuira, Chor dals Larischs, Chor masdo Surmeir, Chor viril Surses e Ligia Grischa. El è stà expert e commember da diversas cumissiuns da musica sco er coeditur da cudeschs da chant e cumponist.
Per ses 88avel anniversari porta l'Artg musical ovras instrumentalas dal giubilar. Ils interprets: Calamus Trio, Rätisches Streichquartett, INSO National Symphony Orchestra Lemberg (Ucraina) ensemen cun la chantadura da Breil, Salome Cavegn (dir. Simon Camartin) ed INSO Quintet d'instruments a flad da Lemberg. Il 2017 – per ses 85avel anniversari – aveva la collega Astrid Alexandre visità Gion Giusep Derungs en sia chasa a Cuira e discurrì cun el surtut davart il cumponer. Quest purtret fitg interessant è era d'udir en quest Artg musical.