Grazia a Hanny Christen datti anc ozendi blers sauts tradiziunals che vegnan sunads da bleras furmaziuns. Ella ha ramassà in grond stgazi da musica populara, sauts che fissan forsa ids a perder. Il 1963 ha ella surdà sia collecziun a la biblioteca da l'universitad da Basilea – e là resta ella durant 30 onns.
Il 1992 chatta Fabian Müller per cas il relasch da Hanny Christen. Ils 12'000 sauts vegnan sortids, cataloghisads e dal 2002 vegn publitgada la collecziun da la chasa editura Mülirad. E per questa gronda lavur survegn ella uss in premi da musica svizra spezial.
Nova vita per sauts emblidads
Suenter la publicaziun datti grond interess da chapellas e furmaziuns che cumenzan a sunar quels sauts: la chapella Stelser Buaba, la Schwyzerörgeli-Musig Mutschellen, Peter Gisler & Die Müliradler, la Hujgroup e bleras autras.
La pli impurtanta è però la Hanneli-Musig, fundada il 2002 che ha procurà ch'ils sauts da la collecziun da Hanny Christen na restan be en ils truclets.
