El è naschì ils 29 d'avust 1920 a Kansas City – mort ils 12 da mars 1955 a New York cun be 34 onns. Durant sia vita e carriera intensiva è el daventà in dals pli gronds musicists dal jazz, in scheni che ha dà blers impuls innovativs al bebop e cun sia moda da sunar il saxofon ha el fascinà in grond public ed influenzà blers auters musicists. Durant ils onns 40 ha el ses megliers temps, suna cun Dizzy Gillespie, Thelonious Monk e Lester Young, pli tard cun Miles Davis – ed ha grond success. A partir dal 1950 sa mida tut: sia lunga dependenza da heroin ed alcohol turmentan corp ed olma, sia creativitad e passiun per la musica van al main. Il 1955 mora el en in hotel a New York. Parker resta però in dals gronds, er sche sia carriera dura be 15 onns, ses tuns procuran anc oz per admiraziun.
L'Artg musical as propona perquai in concert da tribut per Charlie Parker, registrà ils 5 da settember 2020 en la Filarmonia a Cologna. Vus udis ses gronds semperverds sco: Ornithology, My Little Suede Shoes e Yardbird Suite.
