Cumenzà ha tut cun Hanny Christen. Ella ha vivì dal 1899 fin dal 1976 ed ha collecziunà in grond stgazi da musica populara, sauts che fissan forsa ids a perder. A partir dal 1940 aveva ella notà millis da melodias ed il 1963 surdà ella sia collecziun a la biblioteca da l'universitad da Basilea – e là resta quella durant 30 onns.
Il 1992 chatta il musicant e cumponist Fabian Müller per cas il relasch da Hanny Christen. Ils 12'000 sauts vegnan sortids, cataloghisads – ed il 2002 vegn publitgada la collecziun da la chasa editura Mülirad.
Nova vita per sauts emblidads
Suenter la publicaziun datti grond interess da chapellas e furmaziuns che cumenzan a sunar quels sauts. La pli impurtanta è però la Hanneli-Musig, fundada il 2002 aposta per far reviver las melodias veglias. Ils musicants da vaglia Dani Häusler, Fränggi Gehrig (fin il 2008 Markus Flückiger), Ueli Mooser, Peter Gisler (fin il 2018 Christoph Mächler), Fabian Müller e Johannes Schmid-Kunz han registrà 8 discs cun sauts da tut la Svizra, han fatg tschients concerts ed han procurà ch'ils sauts da la collecziun da Hanny Christen na restan be en ils truclets. Ina schelta da quels han els preschentà a Rudolstadt, al 30avel Festival da folk da la EBU e quest concert udis questa dumengia a las 14.00 tar RTR.
