Peder Cadotsch è naschì ils 30 da matg 1922 a Panaduz, è dentant creschì si a Savognin, nua ch'el ha passentà sia uffanza e giuventetgna sco era frequentà la scola populara. Gia durant il gimnasi a Mustér ed anc pli fitg durant il temp da studi a las universitads da Friburg e Berna ha el cumenzà a scriver, per gronda part poesias. Suenter avair cuntanschì l'examen da stadi sco dentist ha Peder Cadotsch avert in'atgna pratica a Lucerna.
Encreschadetgna e charezza, il nascher e murir da la natira èn tematicas da sias poesias. Pli probabel ha gist quai inspirà plirs cumponists rumantschs da scriver chanzuns sin basa da sias poesias.
