Ils ultims trais onns èn ils pretschs d'autos da locaziun creschids per part enfin per il quadrupel. Quai n'è betg mo la culpa dals pretschs da benzin e diesel che creschan, mabain era ch'ils producents d'autos han problems da furniziun.
Ed uss, cura ch'ins dastga puspè viagiar, è la dumonda creschida anc pli fitg. Quai ha per consequenza ch'i dat dapli glieud e memia paucs autos da locaziun ed uschia pon ils locaturs pretender pli auts pretschs per in auto. Locaturs argumenteschan era, ch'i dovran puspè dapli persunal.
Tips e trics per spargnar
Per evitar ch'ins paja memia bler per in auto da locaziun datti insaquants puncts ch'ins duess resguardar:
- Reservar l'auto uschè baud sco pussaivel. Surtut tar autos dumandads sco per exempel autos da famiglia.
- Prender temp per cumparegliar diversas offertas ed offerents. Betg sa concentrar mo sin ils gronds offerents. Savens datti era pitschnas garaschas ch'han autos da locaziun.
- Magari sai esser pli favuraivel dad ir enfin la destinaziun da vacanzas cun il traffic public e pir prender al lieu l'auto da locaziun.
- Adina leger bain las offertas. Magari cuntegnan las offertas era anc imports zuppads.
- Resguardar recensiuns d'auters clients. Uschè pon ins evaluar sche l'offerent è credibel e serius.