Per china parcella possia vegnir registrada en il register funsil federal sto vegnir sclerì dal cudesch funsil responsabel, sch'ì dat servituts sin quella parcella. Suenter lannunzia en il fegl uffizial chantunal, han possessuras e possessurs da dretgs sin parcellas almain dus mais peda dannunziar las servituts funsilas.
Servituts betg inditgadas perdan vigur
Tenor il manader dal cudesch funsil da la vischnanca da Glion, David Huonder, possia dar, che servituts na sajan betg registradas en il cudesch funsil chantunal ch'è actual anc en diever. Sche quellas possian vegnir cumprovadas, sajan ellas tuttina valaivlas. Auter tar il register funsil federal: Là èn servituts betg registradas era betg valaivlas.
Controllar il cudesch funsil chantunal
Ord quai motiv cusseglia David Huonder era, che possessuras e possessurs da talas servituts controlleschian sco emprim las indicaziuns fatgas en il cudesch funsil chantunal per las atgnas parcellas. Sche quellas na constattan betg, sto quai vegnir annunzià aifer dus mais al cudesch funsil. Sche pussaivel cun ina descripziun ed in plan che mussa la localisaziun da la servitut. Ideal fiss anc da trametter la cunvegna signada da omaduas partidas, schina tala cunvegna exista.
