En emprima lingia munta la midada da l'ordinaziun per la protecziun da datas da l'UE er ina midada en Svizra. Er firmas Svizras ch'han da far cun burgais da l'UE ston midar lur ordinaziun. Per exempel ston las firmas infurmar ils consuments transparentamain tge datas ch'ellas rimnan, daco ch'ellas rimnan ellas ed er sch'ellas vegnan dadas vinavant e pertge.
In exempel concret èn ils newsletters. Uss èsi uschia ch'ins sto savens tschertgar il crutsch e prender or el per na betg survegnir trasor mails da newsletter. Da nov ston ins explicit metter en il crutsch sch'ins giavischa tals mails. Sch'ins ha tuttina il sentiment che insatge n'è betg correct ni sch'ins na vegn betg ordlonder, lura pon ins infurmar il protectur da datas federal u chantunal. Quels pon lura prender si contact cun las firmas pertutgadas e guardar ch'i vegnia infurmà correct.