Dragun

Dacurt è vegnì inaugurà a Laax ina senda che passa aut datiers las tschimas dal guaud tranter il vitg e Murschetg. Quella duess servir sco attracziun turistica e generar entradas per amortisar ils custs da 7,5 milliuns francs. Curius è ch'ella sa numna «senda dil dragun». Ils draguns han ina lunga istorgia en il Grischun, pensain be a la legenda da son Gieri ch'è represchentada en pliras baselgias. En Surselva ha quest pled anc survegnì in'autra significaziun. La furma «dargun» ed era la scursanida «drun» stattan per inditgar torrents u bovas. A Sedrun – che prenda ses num da quest pled – datti la moda da dir «esser sel drun» per avair nauscha luna.