L'onn passà è mort nunspetgadamain Valentin Vincenz (1942-2021) ch'abitava a Buchs. Als Rumantschs era el enconuschent sco autur da differentas publicaziuns, tranter auter da l'ovra deditgada a ses vitg nativ Andiast «Zwischen Péz Fluaz und la Pella».
En occasiun da la cumparsa da questa documentaziun dals toponims sin territori dad Andiast avevan nus deditgà in'emissiun a sias retschertgas toponomasticas ch'el aveva gia cumenzà durant ses studis da romanistica e cuntinuà durant sia vita entira. Cun preschentar in pèr nums or da ses roman «Il Multè fatal» (2020) che raquinta fatgs savens snegads vulain nus sa regurdar dad el.
