Val Stussavgia

La Val Stussavgia enconuschan ins surtut cun il num tudestg Safien. Il num sto esser fitg vegl, probablamain deriva el dad in antic num dal flum. Il toponomast grischun Robert de Planta vesa parallelas cun il flum Stura en il Piemont en Italia. Era sche quella val è oz populada dals Gualsers, mussan ils nums rumantschs ina vetta linguistica pli veglia. Nus ans occupain da questa val perifera pervia da la Biennala d'art internaziunala, nua che 18 artistas ed artists han creà ovras d'art dapertut en la vallada.