Festival da colurs e savurs tar «Cecco»
Che RTR ha pudì visitar Francesco Mangiarano en sia cuschina a Mustér è d'engraziar ad auters uschenumnads «Food Influencers». «Oravant tut cuschiniers da l'Italia han fascinà a mai. In di hai jau pensà che era jau pudess empruvar», declera Francesco. Plaschair per la cuschina taliana aveva el dentant gia adina. Sco figl da mamma da la Calabria ed in bab da la Puglia è la cuschina taliana e mediterrana vegnida tgirada cun tradiziuns e delicatessas artisanalas. La devisa da «Cecco» è da far cun pacas ingredienzas in bel e bun plat.
Avant prest trais onns ha Francesco Mangiarano cumenzà cun quest hobi da cuschinar avant la camera. Dapi lura ha el gia publitgà passa 330 istorgias e filmins culinarics en la rait.
Actualmain suondan passa 1'000 persunas Francesco Mangiarano sin ses profil da Instagram «Cecco Mangia 17».
Ils resuns sin mias istorgias culinaricas en positivs. Magari arriva la dumonda: Cura cuschinas per mai?
Ils recepts che Francesco cuschina per ses profils sin medias socialas en per il solit fitg simpels da far suenter.
Paucas ingredienzas e simpel da far ma cun resultat excellent e surprendent.
Per nossa cuschina RTR ha «Cecco» fatg sez tagliarins frestgs tar ina sosa da tomatas tscharescha cun mozarella da buffala. Chaschiel parmesan manizzà cun basilicum. Ingredienzas classicas cumbinadas da nov, per in vair festival da colurs e savurs.
Jau na sun betg in profi en cuschina, ma jau sun Talian e cuschinar è ina part da mes cor, quai è ina passiun.
Francesco Mangiarano ha 34 onns. Da professiun è el installatur sanitar e da stgaudaments tar ina interpresa da Mustér. Ensemen cun sia dunna Melanie en els geniturs da Nevio. Proximamain crescha la famiglia Mangiarano.
«Cuschinar per mia famiglia è fitg bel uschia poss jau sustegnair mia dunna Melanie,» declara Francesco. Savens sajan els dentant era ensemen en cuschina. Ils plats sursilvans sajan la domena da sia dunna Melanie.
Il bun mument per realisar novas istorgias culinaricas per ses profil en la rait decida «Cecco» cun sia dunna Melanie.
«Far ina istorgia culinarica per las medias socialas dovra temp e preparaziun. Las ingredienzas ston esser prontas, il pai per la registraziun cun il telefonin bain posiziunà, lura po la lavur da filmar e cuschinar entschaiver».
Francesco Mangiarano - «Cecco» è il protagonist tar la cuschina da RTR durant il mais da matg.
Davart trics per pasta frestga, davart la fascinaziun per la cuschina taliana e pertge che «Cecco» mussa gugent sias abilitads culinaricas en la rait quai udis vus en las contribuziuns da radio adina las mesemnas en «nossa cuschina».
En cuschina cun «Cecco»
-
Bild 1 von 7. Las ingredienzas da basa per il recept. En las ingredienzas sa reflectescha la bandiera da l'Italia. Tomatas, mozzarella e basilicum. Bildquelle: RTR.
-
Bild 2 von 7. Mintga pass dal recept vegn filmà. Francesco taglia il parmesan avant che manizzar quest cun il basilicum. Bildquelle: RTR.
-
Bild 3 von 7. Tagliarins frestgs preparads il di avant. «Impurtant è da betg far memia fin la pasta», di Francesco. Bildquelle: RTR.
-
Bild 4 von 7. Francesco è superbi che la pasta è gartegiada bain. «Il meglier è tschentar la pasta sin ina taila cun in zic farina e laschar sur notg», di il cuschinier da hobi. Bildquelle: RTR.
-
Bild 5 von 7. Cuntent cun il resultat. Francesco Mangiarano è satisfatg da ses plat simpel ma delizius. Bildquelle: RTR.
-
Bild 6 von 7. «Thermomix» ha era conquistà la cuschina dals Mangiarano. Il Thermomix per manizzar il chaschiel parmesan cun il basilicum. Bildquelle: RTR.
-
Bild 7 von 7. «Peperoncino» tutga tar il punct final caracteristic per «Cecco». Nagin plat senza la «noda-chasa» da «Cecco». Bun appetit! :-). Bildquelle: RTR.