«Igl è in privilegi da pudair viver cun mia dunna e mes uffants en in lieu sco quest», di Giani Schorta, ch'è pur a Tschlin. Il schaner èsi precis trais onns che Gian-Fadri Schorta e sia dunna Pamela han surpiglià il manaschi da vatgas-mamma e la producziun da charn da Jon Pitschen Janett e sia dunna Erica, e ch'els èn sa chasads a Tschlin cun lur trais uffants.
Tar nus na datti betg schefs. Mia dunna e jau ans nus gidain dapertut, en stalla ed en chasa.
Tratga da vatgas e vadels da la razza original brina, ma era passa in tozzel vatgas e vadels da la razza highlander scot – procuran per ina maschaida aparti tar il manaschi bio giusum il vitg da Tschlin. Sin il bain da Giani e Pamela Schorta regia armonia. Vatgas cun e senza corna, sco era lur vadels pon sa mover libramain en ed avant stalla – ellas pon mangiar, baiver e pussar tut tenor giavisch.
Mia dunna Pamela di mintgatant ch'jau saja maridà cun la stalla
Sut la marca Bio Schorta porschan Giani e Pamela Schorta in bel sortiment da spezialitads per la vendita directa. Differentas sorts da salsiz, pulpa e liongias da cuir dal highlander, ma surtut era charn da vadè. Da la charn stagliada enfin il filet pon ins cumprar tut en lur butia, siat dis l’emna. Blera charn da highlander vegn spedida en la Bassa tar clientella privata.
Far il pur a Tschlin sin 1'530 meters sur mar, dovra bain in tschert idealissem. Dentant tut la famiglia ha grond plaschair dal manaschi. Era ils mats Leandro da sis onns, Nico da tschintg onns e Marino da dus onns e mez, giaudan da pudair traffitgar en stalla cun vadellas, cunigls e giaglinas. Dis da paus per tegnair ad aut ils pais datti paucs. Tant pli fitg giauda Giani Schorta il temp da chatscha cun ses chaun Oxana.
Giani Schorta lavura parzialmain en la mazlaria Reto Zanetti a Ramosch. Là mazza ed elavurescha l’um da 35 onns la charn per la vendita directa da Bio Schorta. Ils dis che Giani è en mazlaria, s’occupa sia dunna Pamela dal manaschi. Ils dis che dunna Pamela taglia e vacumescha charn, surpiglia Giani la lavur en cuschina. Cuschinar per la famiglia – quai fa Giani Schorta gugent e savens.
Jau cuschin gugent mintgatant, il menu da tschintg stailas surlasch jau dentant a mia dunna Pamela.
Las mesemnas dal favrer ans accumpogna Giani Schorta en «Nossa cuschina indigena e regiunala». Tranter auter tradescha el il recept da sia pizza preferida, el cuschina per nus flöchets ed ans declera co el e sia famiglia recepeschan il process da viver e murir da l’animal – il process da la pastgira en la chazzetta.
