Per ses 50avel anniversari ha Otto Quadroni da Ftan retschavì ina surpraisa ch'ha midà in zic sia vita. Igl è stà in bon per ir a chatscha da muntanellas cun ses ami Nicola Cantieni, cumprais il butin. Dapi lura è il scrinari pensiunà tant assistent da chatscha, sco era cuschinier e portabutin tar ils dus chatschadurs da Ftan, Nicola Cantieni e Jon à Porta.
La chatscha è per mai sco ina tschintgavla stagiun da l'onn.
«Sche jau fiss anc ina giada giuven faschess jau probabel la patenta da chatscha, ma ussa cun 67 onns è quai tard», conceda Otto Quadroni. El giaudia dentant era uschia il temp da chatscha. Sco cuschinier da hobi è Otto Quadroni bun da striunar plats da buntad. Sia sosa da tomata speziala, cullas da Vnà ma era in plat delizius cun charn da muntanella.
Charn da muntanella è ina delicatessa, ma i dovra temp per la cuschinar bain.
Enfin trais dis cuzza il process per che la charn da muntanella daventia loma e gustusa. Datti era quest onn charn da muntanella? «Jau speresch. Cun in zic fortuna datti era questa chatscha ina bella muntanella per crear in banchet» sa legra Otto Quadroni.
In dals pli bels muments da chatscha ha el gì l’onn 2024 cun ses ami Jon à Porta a chatscha da chamutschs.
Il mument che l'animal croda a terra è in mument fitg emoziunal.
Cun gronda luschezza haja el purtà la chaura chamutsch a val tar la chamona per ses ami chatschadur. La chatscha vegnia vivida e celebrada a l’engronda. Cunzunt las sairas en chamona sajan paschaivlas e spezialas.
-
Bild 1 von 6. La platta da fieu da lain en la chamona dad Otto Quadroni. Otto Quadroni: «Cuschinar sin la platta da fieu dat in sentiment genuin». Bildquelle: Otto Quadroni.
-
Bild 2 von 6. La cuschina en chamona a Stramaina. Qua procura Otto Quadroni per plats delizius per ses amis Nicola e Jon. Bildquelle: Otto Quadroni.
-
Bild 3 von 6. Ina bella stiva per star bain durant las sairas da chatscha. La chamona a Stramaina porscha confort per star bain e ditg. Bildquelle: Otto Quadroni.
-
Bild 4 von 6. Suenter in di da chatscha è temp per far in viva. Jon à Porta, Otto Quadroni e Nicola Cantieni giaudan la tempra da chatscha e la cumpagnia. Bildquelle: Otto Quadroni.
-
Bild 5 von 6. Otto Quadroni superbi da purtar sin dies la chaura-chamutsch. Jon à Porta ha gì fortuna da chatscha da chamutschs l'onn passà. Ma el ha era gì la fortuna d'avair Otto sco portabutin. Bildquelle: Jon Aporta.
-
Bild 6 von 6. Otto Quadroni sa legra sin la chatscha 2025. Otto Quadroni a chaschun da la visita a Ftan. Bildquelle: RTR.