Cun la pensiun prendan ils blers pli pacific – betg Fumia Coray da Sent che ha uss 65 onns. La stad avant dus onns ha ella avert ina pitschna ustaria en il pierten da sia chasa paterna. En «La Scuetta» cuschina ella surtut spezialitads da l'Engiadina Bassa tenor recepts da sia mamma, da la nona, da vischinas u amias.
Il plain in pigna da mia mamma è perfect.
Da giuvna ha Fumia Coray emprendì conditra/confisiera ed è ida en Surselva a lavurar. Cun ses um Sepp e sia famiglia ha Fumia Coray abità passa 40 onns a Laax. En sia cuschina privata ha ella tut ils onns adina fatg turtas, pettas, confect u biscuits da Nadal sin empustaziun da hotels, privats, per nozzas u anniversaris. Fumia Coray è ina dunna spir energia. Ella ha manà sia fatschenta pitschna da nettegiar ed ha lavurà 22 onns en il bogn cuvert da Laax. En ses temp liber è Fumia Coray gugent sa messa en autras rollas ed è stada cun grond plaschair sin tribuna per las inscenaziuns da teater a Laax.
Sche jau pens vi da canedels, pens jau vida testadas.
Sent cun la chasa paterna è tut quels onns stà il lieu da vacanzas per la famiglia da Fumia Coray. Ella ha renovà la chasa durant blers onns cun la finamira da turnar a Sent per la pensiun. E per Fumia Coray èsi ì en vigur ses siemi da l'ustaria «La Scuetta». Ses um Sepp gida da far giu passa 100 kg tartuffels per il plain in pigna e da tagliar fin blers kilos charn setga per canedels.
