Siglir tar il cuntegn

Header

audio
Adolf Ogi festivescha oz ses 75avel di da naschientscha.
keystone
laschar ir. Durada: 6 minutas 9 Secundas.
cuntegn

Adolf Ogi festivescha ses 75avel di da naschientscha

«Freude herrscht» – quai bonmot è probablamain per adina collià cun Adolf Ogi, l'anteriur cusseglier federal da Kandersteg, anteriur directur da la Federaziun da skis e bab da la Neat.

Oriundamain ha Adolf Ogi fatg ina scolaziun mercantila, dentant gia baud ha il sport surprendì sia carriera. Davent dal 1964 è el stà assistent da Elsa Roth tar la Federaziun da skis, silsuenter directur da quella e pli tard lura er directur general da Intersport Schweiz. Durant ils gieus olimpics a Sapporo l'onn 1972 è sia popularitad lura creschida. «Ogis Leute siegen heute» vegniva ditg.

La politica cloma

E cun la popularitad vulevan lura era pliras partidas che Adolf Ogi entria en lur partida. El è sa decidi per la PPS ed è vegnì elegì l'onn 1979 cun in bun resultat en il Cussegl naziunal. Il sigl en il Cussegl federal ha el fatg l'onn 1987, sco successur dal Grischun Leon Schlumpf.

Muments decisivs

Impurtants success politics dad Adolf Ogi èn per exempel stads d'entschaiver cun il project da la Neat. El ch'era sco emprim directur dal Departament per energia e traffic è per uschè dir il bab da la Neat. Era sco directur dal Departament per defensiun, protecziun da la populaziun e sport ha el mess differents accents. Per exempel cun trametter la Swisscoy en il Cosovo ubain cun presidiar la candidatura per gieus olimpics Sion 2006. Dentant, Turin ha lura fatg la cursa.

Engaschi per l'ONU

Er suenter ses temp en chasa federala è Adolf Ogi restà activ. Per exempel è el stà cussegliader en dumondas da sport e pasch, per l'anteriur secretari general da l'ONU Kofi Annan.

Dapli da «Il chavazzin dal di»

Scrollar a sanestra Scrollar a dretga