Sin plattafurmas sco tutti.ch ni anibis.ch insereschan els products ch'ins po cumprar. Sch'insatgi vul lura far quai vegn l'annunzia ch'i saja da pajar via Twint. Per zuppentar la cugliunaria fan las persunas criminals da nov sez era in'empustaziun il medem mument, p. ex. tar Digitec. Là tschernan ellas er la via da pajar cun Twint e tramettan lura quest code da QR u da cifras vinavant a la persuna che vul cumprar lur product.
U ditg auter: Sch'ins croda en sin la trapla, pajan ins senza far insatge fallà l'empustaziun per il cugliun ni la cugliuna. La chaussa ch'ins vuleva sez cumprar na survegnan ins sa chapescha mai.
Problem è enconuschent
Dapi curt avertescha er la Polizia chantunala da Turitg da la nova metoda da cugliunar. E tant ils responsabels dals martgads online sco er dals sistems da pajament èn conscients dal problem. Sco els han ditg envers SRF Espresso, lavurian ins cun tutta forza londervi per evitar talas cugliunarias.
Tge pon ins far per betg crudar en la trapla?
- esser en general precaut tar inserats da privats sin plattafurmas online
- betg pajar ad in numer da telefon ester e nunenconuschent er betg via code da cifras u da QR
- betg sa laschar metter sut squitsch da temp dal vendider u da la vendidra - quai è savens in segn ch'insatge na constat betg
- betg acceptar ch'i duai esser pussaivel da pajar sulettamain via Twint
- sch'ins ha tuttina pajà e constatà ch'igl è ina trapla: annunziar a la polizia e far ina denunzia
