Siglir tar il cuntegn

Header

audio
Il mund virtual duai esser il proxim chapitel da l'internet.
Keystone
laschar ir. Durada: 8 minutas 17 Secundas.
cuntegn

Metaverse - anc lunsch davent da las finamiras

Avant in mez onn ha il schef da Meta (avant Facebook), Mark Zuckerberg, annunzià il mund virtual sco proxim chapitel da l'internet. Cun milliuns da persunas e truscha sco en ina citad gronda. Per il mument culan blers daners, ma en il u ils munds virtuals na para anc betg da girar uschè bler.

In dals ultims projects ha il WEF preschentà e lantschà a l'ultim Forum mundial d'economia a Tavau. In center da congress en in vitg virtual cun tschintg pavigliuns che correspundan a quels dal WEF a Tavau. L'idea è da porscher ina plattafurma e survista per iniziativas internaziunalas.

Grondas investiziuns e tuttina anc plitost lungurus

Tenor experts datti actualmain da quai da 150 projects en differents munds virtuals ch'ins po visitar sco persuna virtuala, p. ex. era concerts. Quels concerts visitan per il mument da quai da 80 fin 150 persunas per giada. 

Ed er uschiglio saja plitost da constattar che persunas ma cunzunt era firmas emprovan da metter in pè en il mund virtual per betg manchentar il svilup. Saja quai cun cumprar terren virtual u s'infurmar tge ch'ins po tut bajegiar en las novas sferas da l'internet. Però propi in plan tge far, hajan anc fitg paucs, uschia hai num en in'analisa da SRF digital.

Bler anc en la fasa d'idea e da svilup

La raschun che tut è anc lunsch davent da la finamira da Mark Zuckerberg è che bler è anc en la fasa d'ideas, da visiuns e da svilup, sco p. ex. er ils egliers per pudair sa mover bain en il mund virtual. U er la dumonda co reglar tut per ch'i na dettia nagins cugliunims, monopolists e tuttina la pussaivladad da far fatschenta.

Ins po s'imaginar quai sco sch'insatgi avess raquintà avant 15 u 20 onns da tut quai che nus faschain ozendi tut senza problems cun il telefonin. Ils experts da SRF digital quintan ch'i giaja anc 5 fin 10 onns fin che tut è da manaivel da quai ch'ins s'imagina ozendi. E lura resta er anc la dumonda critica: Quant grond è il privel ch'ins scappa la finala da la realitad fisica e cunquai er dals problems tut tenor existenzials che fissan da schliar?

Dapli da «Il Digitip - il tip digital»

Scrollar a sanestra Scrollar a dretga