Siglir tar il cuntegn

Header

audio
QField
QField
laschar ir. Durada: 5 minutas 3 Secundas.
cuntegn

Premi per applicaziun da Laax

L'interpresa OpenGis.ch da Laax ha sviluppà l'app «Qfield» per lavurar vid plans da funs e cuntrada. Da curt ha quella gudagnà il premi Swiss App Award. 

Cura ch'in vulcan è rut ora sin l'insla Tonga è l'app vegnida en acziun, per rimnar datas dals donns da cuntrada e bajetgs. Cunquai ch'ins aveva gia installà avant l'app per sviluppar vinavant plantaschas da vaniglia han las autoritads pudì lavurar effizient vid l'analisa dals donns e plans da reconstruir ils lieus destruids.

L'app d'ina interpresa da Laax ha survegnì il Swiss App Award en la categoria interpresas. Ella lubescha da lavurar ordaifer ed en principi far il medem sco in uffizi professiunal da mesiraziun: far cartas e parter quellas cun collavuraturs. 

L'app è cuntinuadamain en svilup 

Intgins problems ha l'app: Tar in ni l'auter telefonin na funcziuna ella betg. Plinavant dovra ella il GPS dal telefonin ed n'è entras quai betg uschè precisa sco mesiraziuns professiunalas. In avantatg ha ella dentant, ed quai po esser la raschun che schizunt l'ONU recumonda ella. Ella è gratuita ed il code è disponibel per mintgin.

Uschia po en principi mintga interpresa prender il code e far ina atgna app. Dentant èsi era pussaivel a mintga persuna sin il mund da scuvrir sbagls, e contribuir al program. Ils manaders da l'interpresa da Laax OpenGis.ch èn persvadids che quai vala la fin la paina.

La strategia da laschar il code avert per la publicitad ha tut tenor er l'effect che l'app vegn nizzegiada en blers lieus nua ch'ins n'avess betg spetgà quai.

Dapli da «Il Digitip - il tip digital»

Scrollar a sanestra Scrollar a dretga