Creà il gieu Wordle ha il sviluppader da software american Josh Wardle. El ha programmà il gieu l'october da l'onn passà per sia dunna. E dapi lura è il gieu daventà in grond hit en la rait. Popular è el cunzunt vegnì grazia a la funcziun da pudair parter ils resultats via Twitter.
Entant giogan mintga di milliuns da persunas il gieu. Quai ha uss carmalà il concern da la gasetta americana New York Times – quel ha cumprà il gieu e cunquai fatg or dal sviluppader Wardle in milliunari. La gasetta vul integrar Wordle en sia collecziun da gieus. Ils fans teman dentant ch'els stoppian bainprest pajar per pudair dar il gieu.
L'original e las bleras copias
La pagina da Wordle è simpla, senza schnicschnac e senza reclama. Igl è dentant da laschar adatg da bleras copias en la rait. Ed er en ils app-stores da Apple e Goggle chatt'ins ina massa copias betg autorisadas, perfin talas che vulan far pajar. L'interessant è dentant gea gist ch'il gieu funcziuna per sasez en la rait – pia independent dals app-stores ed apparats.