La cuschina da Valentin Bezzola sa lascha descriver cun trais chavazzins: improvisada, structurada ed adina autra. Il student da Jazz, che pendulescha savens tranter Berna e Turitg cuschina sez la gronda part da quai ch'el mangia.
90% da quai che jau mangel cuschin jau mez.
Durant l’emna è l’Engiadinais bler en gir. Da la scol’auta a concerts, da lecziuns ch’el dat a provas da sia band. Da las provas enavos en si’abitaziun a Berna, nua ch’el abitescha cun sia amia. Sch’el ha ina giada temp cuschina Valentin Bezzola gugent e gist per plirs dis.
Improvisaziun sco fil cotschen
La cuschina da Valentin Bezzola sa preschenta sumegliant a la musica da jazz. I na dat mai duas giadas il medem, i vegn adina improvisà cun quai ch’è avant maun ed i na vegn mai cuschinà tenor recept. Cunzunt tge che l’abunament da verdura porscha dat avant tge ch’i vegn cuschinà. Structurada è la cuschina dal bassist tuttina. El ha gia da giuven stuì gidar en cuschina ed ha durant intgins onns lavurà en ina cuschina d’ina ustaria da quartier a Turitg, nua ch’el ha pudì emprender diversas tecnicas e process, dals quals ch’el po profitar oz. Cunzunt da cuschinar effizient, senza sguazzar mangiativas, da far «mise en place» e da lavurar schuber ha Valentin Bezzola er oz anc intus.
Jau na desist da naginas mangiativas, en mia cuschina na datti però da princip nagins products d'animals.
La cuschina da Valentin Bezzola sa preschenta da princip senza products d’animals, dentant datti excepziuns tar occasiuns spezialas u cun mangiar ordaifer. Vinavant metta il musicist pais sin products regiunals, stagiunals e nua ch'i va era biologics. Quai n’è betg casualitad, sia mamma manava durant intgins onns in negozi da products dietetics.
Mia cuschina è influenzada da trais dunnas: Mia mamma, mia nona ed ina cuschinunza ch'ha lavurà cun mai.
