Ils 8 da schaner, en bunamain in'emna, fiss sta per la 57avla giada in dals inscunters impurtants da musica populara. Lura sa vessan scuntradas chapellas grischunas e da tut la Svizra en il Forum im Ried a Landquart per far musica durant 4 uras e quai avant in grond public che avess pudì giudair l'atmosfera e star patgific. Però er questa giada è il bel eveniment vegnì annullà pervi da la situaziun da corona.
L'inscunter da chapellas ha gronda tradiziun. L'emprim è vegnì organisà il 1965 sin iniziativa dal musicant e cumponist Hans Niederdorfer. Quella giada en il «Marsöl» a Cuira e moderà ha Wysel Gyr. Dapi divers onns è quel inscunter en il Forum im Ried a Landquart che porscha plazza a var 1000 persunas. Perquai chi na dat nagin inscunter als 8 da schaner vulain nus cumpensar quai cun ina registraziun da temps passads. Nus preschentain ina perla or da noss archiv, parts da la registraziun dal 15avel inscunter chè stà ils 6 da schaner dal 1979 en il Marsöl a Cuira e che è vegnì preschenta da Burtel Bezzola. Vus udis sauts da las chapellas Bärgfrida, Grischuna, dals Landjägerbueba, dals Engadiner Ländlerfründa, da la chapella Oberalp ed er da la chapella dal seminari da magisters.
