Dunnas e raps

Han dunnas in problem da vegnir a frida cun raps? Natiralmain betg. Ellas en gist uschè cumpetentas – u betg cumpetentas – sco umens en dumondas finanzialas. E tuttina mussan differents studis e statisticas che la branscha da finanzas è anc adina en mauns dals umens, che 30% da las dunnas èn dependentas finanzialmain da lur partenari, che bunamain 15% da las dunnas tranter 30 e 39 onns n'han betg in agen conto e che dunnas èn pertutgadas dubel uschè savens sco umens da povradad suenter la pensiun.

En questa Marella mussainsa cun agid da l'istoricra Regine Wecker e da la sociologa Katja Rost che l'independenza finanziala da las dunnas en Svizra è anc fitg giuvna e che rollas socialas sa midan be plaun plaunet. Ma oravant tut mussainsa cun agid da l'experta da finanzas ed influenzadra Corinne Brecher co ch'ins fa urden cun sias finanzas – dal budget sur il provediment da vegliadetgna fin a la cumpra da l'emprima aczia. E quai è natiralmain er interessant per umens.