Da la primavaira fin l'atun sappian ins nua chattar ella, manegia l'artista Laura Bott che cultivescha tschintg ierts ad Ardez. Cumenzà cun quest'activitad ha ella, cura ch'ella è turnada en Svizra avant in tozzel onns. L'emprim fascheva ella quai per avair buns legums sin maisa, ma ozendi è la lavur en iert er insatge che dat plaschair, equiliber ed er in'entrada supplementara. Cun Martina Föhn (Scola auta turitgaisa per scienzas applitgadas) discurra la «Marella» da l'uschenumnada «ortoterapia», nua che l'iert vegn duvrà sco instrument terapeutic. Divers studis dals ultims onns demussan numnadamain: far iert ha effects positivs sin spiert e corp.
Quest'emissiun è ina repetiziun dal zercladur 2021.
