80 onns suenter la mort da l'autura renda La Marella onur a Clementina Gilly. Tgi era quest'emprima dunna rumantscha ch'ha publitgà atgnas poesias? Pertge èn ses diaris scrits per gronda part en talian? Tge mument da sia biografia ha fatg ch'ella è daventada ina piuniera dal moviment feministic en l'Engiadina? Pertge ha ella pir cumenzà a publitgar cura ch'ella aveva 50 onns? Ed è sia lirica differenta da quella da ses contemporans masculins?
In'emissiun cun Rico Valär (professer per cultura e litteratura rumantscha a l'Universitad da Turitg) e cun passaschas da texts da Clementina Gilly.
«Traunter di e not» è ina publicaziun cun poesias, essais e raquints da Clementina Gilly. L'ediziun tgirada da Rico Valär cumpara il november tar la Chasa Editura Rumantscha.
