Per pudair cumprar in moped ha Daniel Bearth sco uffant lavurà sco famegl per gudagnar in zic raps. Ina da sias incumbensas era da far gentar. Cumenzà ha el cun far rauba simpla sco viennaisas en pasta u macaruns. Cun il temp ha el lura emprendì da la mamma diversas tratgas ed uschia ha Daniel Bearth a la fin betg mo pudì cumprar il moped, mabain era emprendì ad enconuscher ina nova passiun.
Il gust da cuschinar era uschè grond che Daniel Bearth aveva ponderà da far in emprendissadi da cuschinier u pasterner. Sco giuvenil na vuleva el però betg lavurar da quellas uras e perquai è il cuschinar restà in hobi. In hobi che para d'esser en ils gens da la familia Bearth. Era ils uffants da Daniel Bearth cuschinan gugent. La fin d'emna cura che tut la famiglia è a chasa, vegn cuschinà ensemen. Il pli gugent n'è Daniel Bearth però betg en cuschina sez mabain ora en il giardin nua ch'el po cuschinar vi dal gril. Ina stagiun da gril na datti betg tar el.
Grillar pon ins era cura ch'i naiva.
Per tut la familia vegn lura era anc cuschinà tratgas tradiziunalas grischunas. Per exempel bizochels u la turta da nusch. Per la turta da nusch datti ina chaussa ch'ha d'esser en cuschina. Il mel d'aviuls che deriva da la surselva. Senza quel na datti nagina turta da nuschs. Per RTR ha Daniel Bearth fatg aposta ina turta da nusch. Cun agid da Martin Candinas è la turta rivada enfin a Cuira.
Auters menus datti percunter mo a chasa tar la mamma, per exempel peschs maghers. U era ils capuns gustan en surselva, tenor Daniel Bearth simplamain meglier che a Berna. Inspiraziuns per novs recepts chatt'el però in zic sin tut il mund. Savens era en la televisiun nua ch'el guarda gugent emissiuns da Jamie Oliver. Fitg gugent vegn era sfeglià en il cudesch d'Andreas Caminada che ha perfin dà in autogram.
