L'avust 2022 ha Pierina Cabalzar Caminada cumenza il 36avel onn da scola sco magistra da cuschina e textil. La gronda part da quels onns ha ella instruì tar la scola Lumnezia. I saja midà fitg bler tar l’instrucziun da cuschina e tegnairchasa ils davos decennis. Ni il temp, ni ils uffants dattan da pensar a Pierina Cabalzar. Quai ch'lla deplorescha il pli fitg, è ch'il «plan d’instrucziun 21» ha scursanì ferm l’instrucziun dals roms da textil e cuschina. Quai fetschia mal ad ella. Pierina Cabalzar è scolasta cun corp ed olma ed ella faschess fitg gugent bler dapli bellas e bunas chaussas cun scolaras e scolars, ma il temp na lubeschia betg quai.
Igl è impurtant da mussar als uffants ina buna schientscha e respect envers products e mangiativas.
Pierina Cabalzar è ina dunna cun bun umor ed ella è ina vaira funtauna creativa. Las ideas na mancan mai ad ella. Savens engolan sias ideas la sien a la magistra da 57 onns. Ella viva sia professiun cun corp ed olma. L'instrucziun da cuschina saja ina vaira celebraziun dals senns di ella. Las uras da cuschina sajan relevantas per la vita sociala da l'uffant: Seser a maisa, prender temp per la maglia, mangiar conscient, star da cuminanza e discussiunar sco ina famiglia. Ils uffants giaudan quai.
Ils uffants am raquintan dapli che a lur magister da matematica
Discurrer da cuschina cun Pierina Cabalzar senza discurrer da sia professiun n'è betg pussibel. Pierina viva la culinarica cun tut ses senns, savurs ed odurs. Quai en scola, ma surtut era a chasa cun sia famiglia. Per sa recrear taidla ella musica classica e fa chaltschiel. Musica è in term impurtant per dunna Pierina. Durant 35 onns è ella stada organista en ses vitg nativ Vrin. Festas da Nadal cun la famiglia vegnivan da quel temp magari a la curta. Ussa giauda ella dapli ils muments en famiglia, per cuschinar star a maisa u era cun far chaltschiel.
Far chaltschiel è per mai recreaziun e meditaziun
Durant il mais da december ans accumpogna Pierina Cabalzar tras l’advent en direcziun Nadal e fin da l'onn. Ella ans raquinta tge che advent munta per ella ed ella ans tradescha era recepts delizius sco sia pizieuta, la petta da Nadal, filet en pasta e vus chattais era in recept per far alvarinas.
Sper recepts delizius regala Pierina Cabalzar Caminada era dus exemplars da ses cudesch «Deletgs culinarics – recepts per in e scadin».
