Patrick Rothmund ha ina biografia musicala fitg differenta. Davent da Nena fin a Rage Against The Machine, davent da Umberto Tozzi fin a Pink Floyd.
Rothmund è creschì si a Trun/Campliun tar sia tatta nua ch'el ha era emprendì d'enconuscher la cultura taliana. La tatta affittava numnadamain chombras a lavurers che vegnivan els onns 80 da l'Italia per lavurar a Trun e conturn sin il bajetg. Entras els ha Patrick emprendì d'enconuscher la musica e la cultura taliana.
Pli tard ha el decis da far l'emprendissadi da scrinari, lura dissegnader da construcziun auta e pli tard il studi d'architectura interna a Basilea. Ina citad che ha plaschì fitg bain ad el. Oz ha l'um da 48 onns in agen biro d'architectura a Trun ed a Laax.
Musica possia tutgar directamain en il cor, quai sch'ella saja directa, sincera e senza firlefanzas. Magari sumegliant a buna architectura, descriva Patrick Rothmund.
RR Mia vita – mia musica 09:00