La finala è tut ì fitg spert. Bun in mez onn suenter avair scrit ora da vender l'entir manaschi pon Claudia e Giusep Columberg uss gia surdar La Furca en ils mauns d'ina famiglia gastronoma. Il prender cumià da l'Hotel Restaurant La Furca è collià cun bleras e grondas emoziuns. La Furca è stà durant passa in decenni il dachasa da Giusep e Claudia che han manà sur tut quels onns il manaschi cun corp ed olma.
«Il davos menu ch'jau hai mess sin maisa en La Furca è stà in Cordon Bleu, e da quels hai jau fatg millis.»
Il cuschinar è adina stà la gronda passiun da Giusep u «Pepi» u «Jumbo» sco quai che blers numnan el. Suenter ses emprendissadi da cuschinier ha el dentant plirs onns mess la palutta e la chazzetta dad in maun e lavurà tar ina firma da bajegiar, quai sco camiunist e lura sco disponent. Cun sa gidar cun sia dunna Claudia che manava quels onns ensemen cun sia cusrina il campadi Fontanivas a Mustér ha Giusep puspè chattà l'amur per la cuschina. E cun tschertgar il 2009 in'abitaziun a Mustér hajan els la finala gist cumprà in entir hotel, l'Hotel Restaurant La Furca.
