Nagins problems ha il giurist da dar tiers ch'el laschava encrescher per il Grischun. Suenter ses studi a Turitg e plirs onns a Berna ha el surpiglià ina lavur tar il chantun, in job betg uschè adattà per el. Ma il giavisch da turnar en il Grischun era pli grond ch'ils dubis ch'il job na saja betg il meglier.
Dapi il 2014 lavura Roman Cantieni sco scolast a la scola mercantila e scola media spezialisada a Glion. El instruescha là dretg ed economia ed a partir da l'avust maina el la scola en in pensum da 50%.
Sper sia lavur per la scola s'engascha Roman Cantieni er politicamain. Avant paucas emnas ha el decidì da midar partida, dad ir da la PCD tar la PS.