Seraina Gaudenz (60 onns) è dapi 21 onns guvernanta en l'Hotel Waldhaus a Segl, là na procura ella betg be per urden e schubradad, ella ha er inizià in project umanitar cun integrar fugitivs da l'Eritrea en ses team. Ina dunna d'acziun, ina cumbattanta perfin è Seraina Gaudenz, ella sezza sa descriva sco betg simpla, pretensiusa, ma cun grond cor. E cun cor avert va ella er en viadi, adina suletta, adina in'aventura.
En la Sri Lanka ha ella tgirà elefants, en l'India termaglià cun uffants en ils slums. Pli cuntradictorica na pudess la vita tranter l'hotel da 5 stailas e baraccas da tola betg esser. «Sche jau sun en viadi, lascha la guvernanta a Segl», ri Seraina Gaudenz. Ed en il Senegal ha ella finalmain chattà l'amur ed in nov dachasa.
En quest Profil raquinta ella ultra da quai, pertge che betg mangiar chaschiel dat forza, cura che ses chavels èn daventads blaus e verds e co ch'ella è ida davant dretgira cun ina interpresa entira – ed ha natiralmain gudagnà.
