RTR porta la glisch e la splendur da Nadal en Vossa stiva. Nus celebrain ina festa da Nadal acustica durant duas uras ed udin oravant tut bleras vuschs d'uffants. Era giudain nus l'atmosfera unica e tadlain blera musica da Nadal.
Dar ina vusch als uffants per Nadal
En nossa emissiun faschain nus animals da pasta cun Sandra Risch Concilio e lur uffants. Nus vegnin a savair, pertge che lur pignol è adina spezialmain bel, schebain ch'el sto mintgatant era vegnir rentà vi da la curuna. E nus udin sco che la glisch da Betlehem vegn en la stiva dals Rischs.
Ultra da quai chantan ils uffants da la Scolina da Surses lur chanzun da Nadal preferida ed els raquintan lur atgna istorgia da Nadal. En quella vegnan striunadas natiers 13 nursas. Quai fa senz'auter senn, damai che quai gida a giats nairs ed era a fugitivs che spetgan bainbaud l'arrivada d'in pitschen uffantet.
Ils misteris da Nadal da pli baud
En l'emissiun cun tempra da Nadal datti era d'udir ina perla auditiva da temps passads. Il piunier da radio Tista Murk gieva «viagiond cul microfon» en l'emissiun cun il medem num. Il december 1960 è Murk viagià en il vitg da Mon en Val d'Alvra. Là è el fruntà sin intgins misteris da Nadal, raquintads d'abitantas dal vitg. Tge tschaveras da Nadal ch'èn vegnidas sin maisa, co ch'ils uffants han passentà ils dis da festa e co ch'els han illuminà la baselgia cun agid da «calcadognas» udis vus en noss'emissiun speziala da Nadal.
