Siglir tar il cuntegn

Header

Purtret da Miriam Makeba.
Legenda: Miriam Makeba. Keystone
cuntegn

Hits e semperverds africans Hits africans - emprim'emna

22.06 fin ils 26.06.2015

  • audio
    Hits africans dals 22.06.2015
    ord RTR Audio dals 24.06.2015.
    laschar ir. Durada: 9 minutas 32 Secundas.

    22.06.2015 Miriam Makeba - Pata Pata - Africa dal sid

    Zenzile Miriam Makeba (04.03.1932 - 09.11.2008) da Johannesburg che vegniva numnada Mama Africa era ina da las pli grondas chantaduras ed activistas da l’Africa dal sid. Durant ils onns 60 è ella stada l’emprima che ha popularisà la musica africana sin tut il mund. Ses emprim grond hit e semperverd è stà «Pata Pata», registrà l’emprima giada il 1957 e cumparì 10 onns pli tard en ils Stadis Unids. Ella ha fatg numerus discs cun auters musicists sco Harry Belafonte, Paul Simon ed er cun ses anteriur um Hugh Masekela. Pervia da ses engaschament encunter la politica d’apartheid en ses pajais ha ella stuì ir ils onns 60 en l’exil. Pir dal 1990, cun la finiziun da l’apartheid, ha ella pudì turnar. Ils 9 da november 2008 è ella morta d’ina attatga dal cor suenter in concert en l’Italia dal sid. «Pata Pata» è oriundamain in toc popular che vegniva chanta en la lingua dals Xhosa e che era ina chanzun per ballar.

  • audio
    Hits africans dals 23.06.2015
    ord RTR Audio dals 24.06.2015.
    laschar ir. Durada: 6 minutas 3 Secundas.

    23.06.2015 Fela Kuti - Obe! - Nigeria

    Fela (Anikulapo) Kuti (15.10.1938 - 02.08.1997) da Lagos era in cumponist, saxofonist e dirigent d’orchester. El vala sco fundatur dal Afrobeat. La famiglia da Fela Kuti fascheva part da la classa mesauna, il bab era preditgant e ses frars medis. Il 1958 è el ì a Londra per cumenzar cun in studi da medischina è però s’inscrit tar ina scola da musica. Gia a Londra ha el gì si’emprima band che fascheva ina fusiun da jazz e high-life, musica moderna da jazz cun elements da la musica tradiziunala da la Liberia, Ghana e Nigeria. Quai era la musica da la classa mesauna durant il temp da las colonias. El ha gì diversas bands - per part cun sur 40 commembers ed ha fatg sur 50 discs. El chantava per gronda part per englais e sias chanzuns han adina puspè crititgà las relaziuns politicas e socialas en l’Africa. Perquai ha el er stuì ir pliras giadas en praschun. Fela Kuti è mort il 1997 da SIDA. Ses patrimoni musical vegn manà vinavant da ses figl Femi, ma er da ses anteriur battarist Tony Allen.

  • audio
    Hits africans dals 24.06.2015
    ord RTR Audio dals 24.06.2015.
    laschar ir. Durada: 5 minutas 41 Secundas.

    24.06.2015 Manu Dibango - Soul Makossa - Camerun

    Manu Dibango è saxofonist, vibrafonist e pianist dal Camerun. Naschi è el ils 12 da december 1933. Cun la maschaida tranter jazz, funk e musica tradiziunala dal Camerun ha Manu Dibango creà ina atgna direcziun da musica. El ha operà surtut en Frantscha, nua ch’el ha accumpagnà tranter auter il Dick Rivers u il Serge Gainsbourg. Ses agen toc «Soul makossa» è stà l’emprim hit african sin plaz in da la parada da hits en ils Stadis Unids. Michael Jackson, cun «Wanna Be Startin’Somethin» e Rhianna cun «Don’t Stop The Music» han emprestà il refrain da la chanzun «Soul Makossa». Dibango ha tgisà omadus. Sin l’album «Wakafrika» ha Dibango reedì ensemen cun artists selecziunads africans e mundials ils pli gronds hits africans.

  • audio
    Hits africans dals 25.06.2015
    ord RTR Audio dals 25.06.2015.
    laschar ir. Durada: 5 minutas 6 Secundas.

    25.06.2015 Abdullah Ibrahim/Dollar Brand - The Homecoming Song

    Abdullah Ibrahim naschì ils 9 d’october 1934 a Kapstadt. Num da naschientscha Adolph Johannes Brand. Avant ch’el s’è convertì tar l’Islam, en ils onns 60, sa numnava el Dollar Brand. El ha cumenzà sia carriera en il medem musical King Kong sco la Miriam Makeba. El è cumponist, pianist e suna flauta, saxofon e cello e vala sco in dals gronds jazzists contemporans. Ses exploit internaziunal ha el gì en Svizra, al club Africana a Turitg. Sia cumposiziun «Mannenberg» valeva sco imni per la populaziun discriminada sut il régime d’apartheid. L’album tar la chanzun «the homecoming song» ha Abdullah Ibrahim deditgà a sia uffanza en l’Africa dal Sid. Il 1962 ha el bandunà ses pajais ed ha vivì per part er en Svizra. Perquai ha el schizunt fatg concerts en ils 3 retgs a Cuira.

  • audio
    Hits africans dals 26.06.2015
    ord RTR Audio dals 26.06.2015.
    laschar ir. Durada: 7 minutas 5 Secundas.

    26.06.2015 Orchestra Baobab – Boul ma mine – Senegal

    Orchestra Baobab è ina gruppa musicala dal Senegal, fundada il 1970. Ils commembers midan regularmain, e van magari a finir er tar la Etoile de Dakar, la gruppa fundativa da Youssou N’Dour. Grazia a la maschaida da rumba Cuban, armonias e ritmica dal Senegal e accords da ghitarra da Barthélémy Attisso s’allegra la gruppa da gronda popularitad en l’Africa. Tranter 1970 e fin 1985 ha la Band registrà 20 albums . 1987 è la gruppa vegnida schliada. Reunificaziun il 2001, obtegnend oramai success er ordvart l’Africa.

Artitgels legids il pli savens