Siglir tar il cuntegn

Header

Purtret da Mory Kante.
Legenda: Mory Kante. Keystone
cuntegn

Hits e semperverds africans Hits africans - segund'emna

29.06 fin ils 03.07.2015

  • audio
    Hits africans 29.06.2015
    ord RTR Audio dals 29.06.2015.
    laschar ir. Durada: 5 minutas 55 Secundas.

    29.06.2015 Rachid Taha – Bleu de marseille – Algeria

    Rachid Taha, è naschì ils 18.09.1958 en l’Algeria e 1968 emigrà cun sia famiglia en Frantscha. Sia musica è inspirada dal stil da l’Algeria maschadà cun rock e tecno. A partir dal 1981 è el stà commember da la band «Carte de sejour» cun commembers immigrants da segunda generaziun. Dapi il 1991 è el activ sco solist, lavurond savens cun il producent englais Steve Hillage, modernisond magari er melodias tradiziunalas u vegls schlaghers dal Maghreb. Live è el ina cumparsa detg selvadia, punk en tgirom nair.

  • audio
    Hits africans 30.06.2015
    ord RTR Audio dals 30.06.2015.
    laschar ir. Durada: 3 minutas 42 Secundas.

    30.06.2015 Ray Lema - Koteja - Congo

    Ray Lema, percussiunist, pianist, ghitarrist, cumponist e chantadur, è naschi ils 30 da mars 1946 en il Congo. Si’emprima educaziun musicala è stada classica e suenter ha el scuvert Jimi Hendrix e sumegliants musicists. Pervia d’in scumond da preschentaziun, sut il dictatur Mobutu dal Congo, è Ray Lema emigrà en l’America nua ch’el ha registrà il 1982 la chanzun Koteja. Oz viva Lema a Paris, nua ch’el operescha tranter auter era sco cumponist da musica da films.

  • audio
    01.07.2015 Ladysmith Black Mambazo – Homeless – Africa dal Sid
    ord RTR Audio dals 01.07.2015.
    laschar ir. Durada: 4 minutas 50 Secundas.

    01.07.2015 Ladysmith Black Mambazo – Homeless – Africa dal Sid

    Text: La gruppa a-cappella fundada ils onns 60 en il township Ladysmith. Joseph Shabalala è il manader dal chor viril. «Homeless» ha lantschà il 1986 la carriera internaziunala dals Ladysmith Black Mambazo. En collavuraziun cun Paul Simon, che ha duvrà la chanzun «Homeless» per ses album «Graceland», è la chanzun (plus duas autras) vegnida registrada a Londra. Nelson Mandela ha numnà Ladysmith Black Mambazo ambassadurs culturals da l‘Africa dal Sid. Els han avert las portas per divers auters chors sidafricans, sco p.ex. Mahlathini and the Mahotella Queens.

  • audio
    02.07.2015, Johnny Clegg & Savuka – Asimbonanga (1987) Africa dal Sid
    ord RTR Audio dals 02.07.2015.
    laschar ir. Durada: 5 minutas 21 Secundas.

    02.07.2015 Johnny Clegg & Savuka – Asimbonanga – Africa dal Sid

    Il ghitarrist, chantadur, sautunz e cumponist Johnny Clegg è naschì ils 7 da zercladur 1953 a Manchester. Il bab è sta pilot da la Royal Air Force, ses geniturs èn sa spartids baud. Clegg è suandà en la patria da la mamma a Simbabwe. Pli tard han els midà chasa a Johannesburg. 1976 han Sipho Mchunu e Johnny Clegg publitgà lur emprimas singles. Il régime d’apartheid ha scumandà ils texts dal duo. Quai ha augmentà la popularitad dal duo. Clegg ha lura fundà las gruppas Juluka e Savuka, demonstrond cun quellas la convivenza tranter alvs e nairs en il Sidafrica. Cun in grondius success internaziunal. Da la Witwatersrand-Universität e da la School of Law da City University of New York ha Clegg retschavì il docter honoris causa. En l’onn 2012 ha il president da l’Africa dal Sid surdà a Johnny Clegg la medaglia d’argient Ikhamanga per las prestaziuns en art, cultura, litteratura, musica, schurnalissem e sport. El vegn er numnà il «zulu alv».

  • audio
    03.07.2015 Mory Kante –Yé ké yé ké (1988) – Guinea
    ord RTR Audio dals 03.07.2015.
    laschar ir. Durada: 8 minutas 32 Secundas.

    03.07.2015 Mory Kante –Yé ké yé ké (1988) – Guinea

    Yé ké yé ké è stà il hit da stad en l’Europa dals onns 80, lantschond quella unda ch’ins ha lura numnà la «world music». Quai è stà il punct culminant da la carriera da Mory Kante. Il musicist da Guinea è naschi ils 29 da mars 1950 sco in dals pli giuvens dals 38 uffants da la famiglia. Ils Kantes eran ina famiglia da «griots», ina funcziun impurtanta en l’Africa dal vest che cultiva las tradiziuns oralas, quai vul dir il raquintar istorgias, e dat er vinavant la musica. Ins na daventa griot, ins nascha sco griot e quai resta en famiglia. Blers musicists africans derivan er da quella tradiziun: er Youssou N’Dur e Habib Koité. Il 1971, cun 21 onns, daventa Mory commember da la band renumada Rail Band de Bamako. Dapi il 1978 va el pli e pli sias atgnas vias ed integrescha er pop e rock en sia musica. Il 1988 ha el in dals emprims hits mundials da musica africana cun il Yé ké yé ké – registrà a Paris!.

Artitgels legids il pli savens