Siglir tar il cuntegn

Header

cuntegn

Tik Tok foodtrends E sco dessert: tiramisu al limoncello

La plattafurma da videos TikTok ha influenzà diversas spartas. Musica, litteratura ni era mangiar. Surtut tratgas simplas dad autras culturas èn idas viral.

Tgi che na sa betg tge cuschinar, quel chatta adina dapli inspiraziuns sin las medias socialas. Ma betg mo en la cuschina privata san questa inspiraziuns gidar. Tratgas che van viral, san era procurar per dapli clientella en ils restaurants che han ils hits virals sin lur carta. Impurtant na è numnadamain betg sco che insatge vegn cuschinà mabain sche ils products èn da buna qualitad.

Cun products da nauscha qualitad, ins na sa betg far insatge bun.
Autur: Andrin Willi expert da gastronomia

Pasta al limone

La pasta al limone na è betg ina tratga per quels che fan ina dieta. Ina da las ingredienzas principalas è paintg. Sper quai ins dovra citrona, agl e pasta e per tgi che ha gugent anc in zic parmesan ni peccorino. Tut tge ch'ins ha da far è brassar l'agl e la paletscha da la citrona en il paintg, suenter metter directamain la pasta en la sosa e metter tiers da temp a temp aua per che la pasta sa coier. L'impurtant tar quest foodtrend, è tenor Andrin Willi, da prender citronas da buna qualitad, surtut da bio cun quai ch'ins dovra era la paletscha.

audio
Pasta al limone
ord Nossa cuschina dals 22.11.2023. Maletg: SRF
laschar ir. Durada: 3 minutas 42 Secundas.

Salata da cucumeras asiatica

Recepts per la salata da cucumeras asiaticas datti massa sin la plattafurma TikTok. Ils videos ils pli virals han fin a passa 20 milliuns views. Per far la salata ins dovra cucumeras da snack ch'èn pli pitschnas che normalas cucumberas da salata. Quellas ins ha da tagliar en sin ina vart vertical fin sur la mitad e sin l'autra vart diagonal, cun ina distanza da ca 5 mm. Uschè resultan spiralas da cucumeras londerora. Per la sosa dovran ins sosa da soja, mel e flocs da chili.
Andrin Willi è persvas da quest foodtrend. Per el è quai ina buna alternativa d'ina salata da cucumeras tradiziunala ch'ins enconuscha tar nus per exempel cun ina sosa da jogurt. Surtut cun ina grillada cun pulaster ni cun crevettas sa la salata asiatica esser ina buna cumbinaziun. Per tgi che na ha betg gugent la sosa da soja sa era far las spiralas da cucumeras e metter tiers ina simpla sosa cun ieli d'ulivas e balsamico.

audio
Salata da cucumeras asiatica
ord Nossa cuschina dals 01.11.2023. Maletg: TikTok / spicednice
laschar ir. Durada: 4 minutas 57 Secundas.

Pasta da tomatas e feta

Per questa sosa ins na sto betg esser in passiunà cuschinier. Tut tge ch'ins ha da far è: Tagliar per mez tomatinas, metter quellas en ina furma da furn, in mitad vegn in bloc da feta, tiers vegn anc in pèr guts d'ieli d'ulivas e spezarias tenor gust. Tut en il furn e lura maschadar cun la pasta ch'ins cuschina separat.
Questa tratga è stada ina da las emprimas ch'è ida virala sin TikTok ed ha en tscherts pajas procurrà per ina mancanza da feta en las butias.
Per tgi che na ha betg gugent feta recumonda Andrin Willi da duvrar in chaschiel recent per exempel Sbrienz.

audio
Pasta cun tomatas e feta
ord Nossa cuschina dals 08.11.2023. Maletg: Pixabay
laschar ir. Durada: 5 minutas 47 Secundas.

Big Mac Wrap

Il Big Mac Wrap è in'alternativa dal burger che mintgin sa far a chasa. Per far il wrap ins dovra in paun plat, charn manizzada, salata e chaschiel da burger. Per la sosa ins maschaida ketschup, maionesa, mail e cucumeras manizzadas en aschieu. Per l'expert da gourmet na è quest nagut ch'el cuschinass per ses giasts. Tuttina enclegia el ch'igl è in trend. Ils wraps èn fatgs svelt e mintgin ils sa emplenir tenor gust.

audio
Il Big Mac Wrap
ord Nossa cuschina dals 15.11.2023. Maletg: pixabay
laschar ir. Durada: 3 minutas 3 Secundas.

Tiramisu al Limoncello

Il tiramisu al Limoncello ins fa sco in normal tiramisu. Cun ils biscuits lungs, mascarpone e groma, ma senza café e senza amaretto. Empè dal amaretto sa prenda limoncello cun suc da citrona. Garnir san ins la fin cun raspar fin la paletscha da la citrona. Ina varianta senza alcohol è era pussibel, simplamain remplazzar il Limoncello cun sirup da citrona. Per tgi che na ha betg gugent citronas, quel sa far in tiramisu d'oranschas cun in liquor d'oranschas u senza alcohol cun in sirup d'oranschas.

audio
Tiramisu al Limoncello
ord Nossa cuschina dals 29.11.2023. Maletg: pixabay
laschar ir. Durada: 2 minutas 27 Secundas.

RTR nossa cuschina 10:15

Artitgels legids il pli savens