Tips e trics: Co sgrattar fanestras da l'auto

Tgi che n'ha nagina garascha per parcar ses auto sto ils dis da fradaglia sgrattar davent il glatsch da las fanestras da l'auto avant che partir. La varianta la pli sperta fiss da derscher aua sur la fanestra davant da l'auto – quai n'è dentant nagina buna idea. Pervia da la gronda differenza da temperatura po la fanestra sa sfender u schizunt ir en tocs. Da remplazzar ina fanestra davant tar in auto po bainsvelt custar fin milli francs. Ils sprays da sglatschar funcziuneschan tenor l'expert da mobilitad dal TCS Pascal Berchtold bain, ma cun quai che quels cuntegnan alcohol èn quels nuschaivels per l'ambient. Perquai recumonda l'expert il bun vegl sgrattin per las fanestras. U ch'ins metta la saira ina taila u ina folia d'isolar sin la fanestra davant, alura na schela la fanestra betg. En mintga cas as duess la saira far si ils sfruschavaiders per ch'els na schelan betg vid la fanestra. E tgi che na fa betg davent naiv u glatsch da las fanestras da l'auto ristga ina multa. La fanestra davant, las duas fanestras davant da la vart ed ils retrovisurs ston esser libers da naiv u glatsch. Uschiglio smanatscha ina retratga da la lubientscha da manischar da fin trais mais.