Siglir tar il cuntegn

Header

Tadlar l‘audio . Durada 2 minutas 16 Secundas.
cuntegn

Savognin tema per ses label da famiglias

Il label «Family Destination» onurescha destinaziuns ch'èn spezialmain adattadas per famiglias. Otg lieus dal Grischun han quest label. A Savognin n'èsi il mument però betg cler, sch'il label po vegnir mantegnì.

Per survegnir il label «Family DestinationÌ sto ina destinaziun avair ina fitg buna purschida per famiglias cun uffants. Per exempel cun ina plazza da giugar ed ina tgira d'uffants. Vitiers vegn almain in hotel cun fitg bunas prestaziuns u ina quota d'abitaziuns da vacanzas dalmain 20% che correspundan als basegns per uffants. Passa 20 puncts ston vegnir ademplids, tranter auter vai era per la segirezza dals uffants.

Sco quai che Chantal Beck, la vicedirectura da la Federaziun svizra da turissem ha ditg envers RTR, hajan controllas tar las abitaziuns da vacanzas a Savognin mussà, che betg tuttas ch'eran vegnidas decleradas sco adattadas per uffants sajan era propi adattadas tenor in catalog da pretensiuns. Perquai ha Savognin Turissem ussa puspè scrit a tut ils possessurs da vacanzas da confermar sche las abitaziuns correspundan a las pretensiuns per uffants.

Tenor Chantal Beck datti era controllas. En il mender cas pudess Savognin perder il label. Tenor Tanja Amacher da Savognin Turissem na fiss quai nagina tragedia, ma il label saja schon fitg impurtant, cunquai che Savognin Turissem focusescha sia reclama sin vacanzas per famiglias.

Dapli da «Total local»

Scrollar a sanestra Scrollar a dretga