Precis 200 onns èsi gia che dus chatschaders da chamutschs sursilvans – Placi Curschellas ed Augustin Biscuolm – han ascendì il pli aut piz da la Surselva. Sco emprims umans han els cuntanschì il prim da settember 1824 il piz Russein, il punct il pli aut dal piz Tödi sin 3'612 meters sur mar. Quel piz ha il reverenda evangelic ed alpinist Fadri Ratti da Favugn era gia muntà. E – sco ils dus alpinists Curschellas e Biscuolm – è era Fadri Ratti in pionier en chaussas alpinissem: Sco emprim uman ha el numnadamain cuntanschì tut ils 460 pizs en il Grischun ch'èn sur 3'000 meters auts.
Fadri Ratti ha manà ina glista davart sias ascensiuns dals pizs, ma cifras sco meters d'autezza u distanzas fatgas na sajan mai stadas fitg impurtantas. Anzi, el haja plitost dà paisa ad ina planisaziun prudenta da las rutas ed a l'experientscha en la natira.
Co che Fadri Ratti senta la proximitad tar il tschiel e tar Dieu sin il piz d'ina muntogna, co ch'el prenda quella era en baselgia e tge che motivescha el d'ir en ils auts raquinta el en la «Vita e cretta».
