... che Tista Murk na gieva mai cun auto? El vegniva pli u main adina charrà da sia dunna Tilda!
... che Tista Murk aveva ditg ina giada a sia dunna – suenter trais emnas esser maridads: «Sche jau savess co salvar il rumantsch, fiss jau pront da ma laschar crucifitgar!» Il citat remartgabel è da chattar en Deplazes, Gion: P. Maurus Carnot e «ses giuvnals romontschs» (Annalas 2004).
Sche jau savess co salvar il rumantsch, fiss jau pront da ma laschar crucifitgar!
... che Tista Murk era stà in dals emprims gronds fans da la lingua unifitgada rumantsch grischun? El ha perfin scrit in’opera en rg ed aveva survegnì «La clav d’aur», in premi en reconuschientscha per ses engaschament per il rumantsch grischun.
Savevas vus ...
... che Tista Murk sunava il corn en la musica instrumentala da la citad da Cuira?
… che Tista Murk è naschì ils 15 d’avrigl dal 1915 sco 15avel uffant, a las 15.15? E sco che Ernst Denoth ha commentà en in film quella coincidenza da la cifra 15: «Se non è vero, è ben trovato!»
... che Tista Murk ha dà num a ses emprim figl «Schimun» tenor l’umanist e poet Schimun Lemm (Lemnius), oriund da Guad en Val Müstair? Tista Murk aveva ina gronda admiraziun per Lemnius ed aveva era scrit in toc teater sur da quella persunalitad: La mort dal poet (1950).
... che Tista Murk aveva emprendì esperanto durant ses temp da studi a Paris? El ha perfin scrit ina curta grammatica inclusiv vocabulari rumantsch-esperanto!
Savevas vus ...
... che l’emissiun «Dil parlament», moderada da Tista Murk, vegniva emessa var 4 giadas ad onn, mintgamai venderdi saira suenter las 22.20? Oz fiss quai in urari ideal sin SRF 1, gist suenter il 10vor10, en plazza da l’Arena.
... ch’il responsabel a Turitg per l’emprima emissiun da televisiun rumantscha, cumpilada da Tista Murk, era Wysel Gyr? Quel è daventà pli tard ina persunalitad en il mund da la musica populara svizra, vegniva numnà era il «papa da la musica populara».
... che Tista Murk aveva sustegnì dal 1980 la candidatura per gieus olimpics en Grischun? El aveva perfin propagà in gea tar quella votaziun chantunala cun agens inserats. Ma a la fin dals quints n’hai betg propi gidà: La populaziun grischuna ha ditg na cun 77 pertschient da las vuschs.
Savevas vus ...
... che Tista Murk ha inventà sez il num da l’emissiun «Balcun tort»? E sa chapescha era er il titel da sia emissiun da radio «Viagiond cul microfon» ina da sias creaziuns.
... che la musica da flauta da Pan en il film «Il barun da Planatsch» è vegnida arranschada e sunada da Jöri Murk, il figl da Tista Murk? Jöri Murk è in enconuschent sunader e producent da flautas da Pan en Svizra.
... che Tista Murk na vuleva mai far suttitels tudestgs per ils films dad «Il balcun tort». Tenor el fiss quai stà in enclin envers la Svizra tudestga. El era da l'idea: «Die sollen halt Rätoromanisch lernen (...), die Westschweizer und die Tessiner untertiteln ihre Sendungen ja auch nicht für die Deutschschweizer, sonst würden noch weniger von ihnen Französisch und Italienisch lernen.»
Savevas vus ...
... che la dunna da Tista Murk, dunna Tilda, aveva perfin fatg in curs da smincar per pudair s’occupar dal bellet dad acturas ed acturs en ils teaters da Tista? Ed ella cusiva perfin era ils blers costums da teater.
... che Tista Murk ha tegnì dal 1985 il pled da 1. avust a Lai-Valbella? En quel pled condemnescha el che il Grischun e la Svizra na resguardia betg adequatamain la lingua rumantscha. Tista Murk sa dumonda perfin, sch’i na dettia betg era en connex cun il resguard per il rumantsch ina spezia dad «apartheid».