Mort saja el gist suenter las quatter a bun’ura, vegn detg, ma da tge ch’el saja mort na vulevan ins ditg betg tradir al pievel russ – el, quai era Wladimir Iljitsch Lenin.
El vala sco in dals chaus da la Revoluziun d’october che ha fatg flus cun la monarchia zaristica e sco fundatur da l’Uniun sovietica. Lenin è ina da quellas persunalitads istoricas, che han marcà il 20avel tschientaner.
La religiun sco instrument
Sia politica era dentant era marcada dad ina tenuta fitg decisa envers la religiun, quinta il teolog promovì e scienzà da religiun Rolf Bossart en la Vita e cretta. Per Lenin na saja la religiun betg stada auter ch’in instrument en ses cumbat cunter ils pussants, che suttamettevan il proletariat.
Ralf Bossart discurra dad in socialissem religius, che fa diever da la bibla e ses texts là, nua ch’els sustegnan il messadi dal moviment dals revoluziunaris radicals enturn Lenin.
La Russia e la religiun – u l'opium
In dals connexs pli enconuschents tranter Lenin e la religiun è in citat, che deriva oriundamain da Karl Marx: «La religiun è l'opium dal pievel». A Lenin vegn attribuì ch'el haja fatg londeror «La religiun è l'opium per il pievel» per crititgar uschia la Baselgia da l'inizi dal 20avel tschientaner sco manuala dals pussants.
En la Vita e cretta faschain nus l’artg da la religiun ortodoxa sco sustegn da la monarchia zaristica, sur il socialissem religius da Lenin fin a la rolla da la religiun en ils servetschs dals dictaturs Stalin e Putin. Lenin dentant è da vesair anc oz – dapi sia mort posa el sco mumia en in mausoleum sper il Kreml a Moscau.