Cun 13 onns ha Paula Mia gudagnà la concurrenza «Chanta er ti». Da quai temp era Tumasch è alias Thomas Cathomen gia turnà insaquants onns en il Mexico nua ch’el è naschì. Per il mument è la chantautura da Glion per in semester en l’exteriur, numnadamain a Gent en Belgia. Il musicist Tumasch è è percunter turnà en Svizra – almain per in mument.
Sco duo han els registrà il 49avel Top Pop Rumantsch «Enzatgei bi». La chanzun è naschida ensemen cun il producent Manfred Zazzi en ils Aquarium-Studios. Cumenzà ha la producziun be tranter l’artista e l’artist. Ensemen cun il producent è la cumposiziun lura daventada pli e pli cumplexa cun differents instruments ed elements electronics. Pliras versiuns pli tard pon els ussa preschentar la proxima ediziun dal Top Pop Rumantsch.
