«Da cruschs e cots»: 500 onns refurmaziun

Dals 22 als 29 d’october 2017 sa fatschenta RTR cun l’istorgia da la refurmaziun en Grischun, sias consequenzas ed ils connexs cun noss mund dad oz.

L’october dal 1517 duai Martin Luther avair martellà sias 95 tesas vid la porta-baselgia da Wittenberg. En curt temp è el daventà in dals umens ils pli prominents da l’Europa.

Luther ha purtà ulteriur moviment en in temp gia muventà

Dapertut èn sias ideas vegnidas percepidas, discutadas e contestadas. Igl era generalmain in temp da transfurmaziun, plain projects ed ideas novas, cun ina societad e cultura en moviment.

Mo uschia ha la refurmaziun pudì sa derasar en bleras regiuns da l’Europa. Ella ha provocà cuntramoviments da vart catolica ed ha gì ina gronda influenza lunsch sur la vita religiusa ora.

La refurmaziun ha er refurmà la vita en il Grischun

Suenter in cumenzament cun ina convivenza pragmatica e toleranta è il mund en il Grischun sa midà vers la fin dal 16avel tschientaner: El è sa separà en in mund «da messa» ed in «da predi». Questa polarisaziun ha influenzà tut ils secturs da la vita – uschia er la producziun litterara, la naschientscha dal pled scrit rumantsch e la scena d’art.

RR actualitad 11:15+