L’onn proxim festiveschan ils da Trun quasi lur ischi. Sut quel era la Ligia Grischa vegnida fundada avant 600 onns. Perquai datti in teater al liber. Gia avant trais onns ha la planisaziun dal teater al liber cumenzà. Dapi la davosa fin d’emna è il project puspè pli concret, cun l’emprima sentupada da las acturas e dals acturs. Ed igl è era stà l’emprima emprova da text.
Reschissur dal teater «Sut igl ischi 2024» è René Schnoz, ed el è quasi il sulet participant che n’è betg da Trun. Fin questa sentupada ha el sulettamain gì contact cun las acturas ed ils acturs durant il casting.
Nus vein ina super truppa.
I dat ina lectura communabla da l’entir toc. Mintgina e mintgin legia sia rolla. E quai dat la fin finala in maletg pli concret dal teater. Quai saja fitg impurtant, ha ditg René Schnoz. E che tuts vegnian ensemen, quai capitia pir puspè la stad. Avant lavurian adina mo pintschas gruppas ensemen per las emprovas.
Il text da l’autur Michel Decurtins vegn anc a sa sviluppar e sa midar cun las emprovas. Quai saja in process natiral. I sa tracta d’ina istorgia fictiva che gioga en il temp dad oz. Il toc è inspirà da fatgs istorics da la veglia Ligia Grischa. In toc dals da Trun che tracta la vita a Trun.