Siglir tar il cuntegn

Header

audio
Il return da ABBA
Or da Musica dals 05.11.2021.
abspielen. Laufzeit 8 minutas 54 Sekunden.
cuntegn

ABBA Voyage: il viadi dad ABBA cuntinuescha

ABBA: 400 milliuns portatuns vendids e success mundials sco «Waterloo», «SOS», «Fernando» e «Dancing Queen».

Mamma mia! Tge novitad. Suenter ina pausa da 40 onns annunzian ABBA lur return en il studio e sin ils palcs. Lur disc da comeback cun il titel «Voyage» cumpara oz e fa endament als temps glorius da la band durant ils onns 70 ed 80. La fundaziun è stada il 1972 a Stockholm, cun ils dus pèrins Anni-Frid Lyngstad e Benny Andersson ed Agnetha Fältskog e Björn Ulvaeus. Dus onns pli tard cumenza lur carriera fenomenala tar il  Grand Prix d’Eurovision. Cun lur chanzun «Waterloo» gudognan ABBA la concurrenza e daventan stars mundials.

Ina cascada da hits

Durant ils proxims 10 onns cumparan 7 albums e tuts daventan gronds success: «Arrival», «Super Trouper», «Voulez-vous» e las singles: «SOS», «Money, Money, Money», «The Winner Takes It All», «Dancing Queen» e bleras autras che daventan semperverdas e che restan per adina en las ureglias. La fin dals onns 70 datti però tensiuns en la band, ils pèrs sa separan ed a partir dal 1982 datti ina pausa, ina lunga pausa.

Il return suenter 40 onns

In settember lura la gronda surpraisa. ABBA annunzian lur comeback ed il disc «Voyage». Per tut ils fans da la gruppa svedaisa in grond plaschair. Malgrà lur pausa eran Agnetha, Anni-Frid, Benny e Björn restads en la memoria da lur public, er cun musicals e collecziuns da chanzuns sco «Abba Gold». Quel disc è sta 1'000 emnas en la parada da hits britannica suenter ch’el era cumparì il 1992.

Cur ch’els han discutà l’idea d’in return eran tuts quatter fascinads e plain fieu e flomma. L’emprim vulevan els far be duas chanzuns novas, a la fin dai dà in album entir.

audio
ABBA en il studio
aus Musica vom 05.11.2021.
abspielen. Laufzeit 31 Sekunden.

Il passà è anc fitg preschent – e co sa preschenta l’avegnir?

Sin tut il mund pon ins udir lur hits, ed anc adina datti blers fans. E quels s’allegran sin las chanzuns novas e vulessan er vesair lur idols sin il palc, er sch’els han surpassà ils 70. Concerts dal viv na vegni però betg a dar, sco i para be da quels cun «Abbatars», figuras digitalas che substitueschan las artistas ed artists. Per quai han els sa laschà registrar durant emnas da 160 cameras per avair las reproducziuns. In pau inquietant, e tutga quai il gust dal public? Però forsa è quai en temps da pandemia anc ina bun’idea.

audio
ABBA: Ils abbatars
aus Musica vom 05.11.2021.
abspielen. Laufzeit 13 Sekunden.

ABBA 2021

Oz cumpara il disc «Voyage», e gia avant in pèr emnas èn vegnidas las emprimas singles: «I Still Have Faith In You», «Don’t Shut Me Down» e «Just a Notion», chanzuns en lur stil incumparabel che procuran spert per in effect «aha». Quai vegn però a restar in'episoda. En in'intervista preciseschan Björn Ulvaeus e Benny Andersson che suenter quest disc sa retiran ABBA per dal bun.

Artitgels legids il pli savens

Scrollar a sanestra Scrollar a dretga