Ella saja adina stada spir energia, forsa er entras il sport. Sa mover, il pli gugent giuadora en la natira, anc oz ina da las grondas passiuns d'Angelica Desax. La fin dals onns otganta ha ella schizunt avert ina stizun da sport a Danis, ina stizun fabritgada ord in clavà. Ella vendeva principalmain skis da passlung. Intgins onns pli tard, cura che la stizun sa chattava dentant a Mustér, ha Angelica Desax stuì dar si sia stizun da sport.
Suenter avair administrà plirs onns il consum da Danis e Tavanasa ha ella manà durant trais stads la chamona da Biferten sut il Muot da Rubi, quai cun agid da sias buobas durant las vacanzas da stad. Ella haja gì il cletg ch'i saja stà trais bellezza stads ed ella saja currida savens da Breil sin la chamona ed engiu, uschia saja ella er adina restada fitta.
Tschertas chaussas faschess jau oz forsa in zic auter, dentant il bler faschess puspè uschia, pertge igl è sta bler bel ed interessant.
Cun 50 ha Angelica Desax fatg in tagl. Ella ha surpiglià l'ustaria Bündner Rigi en il territori da skis da Sursaissa ed uschia ademplì in giavisch e siemi. Quai haja duvrà in tschert curaschi. Oz di ella che quai saja pli probabel stà il pli bel temp da sia vita. Ella ha adina cuschinà gugent ed er adina apprezià il contact cun la glieud. Quai temp intensiv dal Bündner Rigi haja er purtà fitg bellas e bleras amicizias, uschia Angelica Desax.
Anc oz cuschina ella gugent, sche pussibel adina cun products ord l'agen iert e cun products indigens. E betg mancar en sia cuschina astga in bun ieli d'ulivas ch'ella racolta mintgamai sezza en l'Italia, in pajais ch'ella visita regularmain, saja quai per far vacanzas, per far turas da velo u simplamein per giudair la buna cuschina taliana.