«Vuls betg far arbiter?» Mintgin ch'ha da far insatge cun in club da ballape ha probablamain gia udì questa dumonda. Ils arbiters èn dumandads ed indispensabels per in gieu da ballape.
Dentant chattar els? Betg uschè simpel per blers clubs. En la Svizra Orientala tar l'OFV tschivlan radund 420 arbiters ed arbitras regularmain gieus da ballape. Davent da juniors C, sur equipas activas, da dunnas fin tar ils seniors. Tuts dovran quest um u questa dunna che porta il tschivlot e las duas cartas cun el.
Chattar arbiters è ina sfida
Ir a la tschertga d'arbiters na tutga betg gist tar la lavur preferida da clubs da ballape. Quai concedan er Patrick Rothmund (president CB Trun/Rabius) e Silvan Caduff (president CB Lumnezia). Ils Lumnezians han avant paucs onns gì il cletg da chattar in arbiter e quai a moda plitost casuala. Entras in auter arbiter hajan els chattà cun Tidjani Traore in arbiter dad Aarau che tschivla per il club. In cas da fortuna, di Silvan Caduff. Dapi il 2018 è Traore uss l'arbiter dal CB Lumnezia.
Sfidas pervia d'arbiters ha er il CB Trun/Rabius gì. Il club da la Cadi ha ils ultims onns adina puspè gì persunas che han tschivlà per il club. Quels hajan dentant bainspert puspè chalà, di Patrick Rothmund. Dacurt han els uss chattà in arbiter che arbitrava fin qua per il FC Vaduz. L'arbiter nov vegn dentant pir a quintar per il club davent da la stagiun 2026/2027.
Ils arbiters passiunads datti era anc oz
Radund 420 arbiters ed arbitras tschivlan per l'OFV, la Federaziun da ballape da la Svizra Orientala nua ch'è il Grischun fa part. In dad els è Max Kressig (33) che tschivla dapi il 2009 per il club da ballape da Tusaun/Cazas. I saja simplamain ina gronda passiun da tschivlar gieus da ballape, raquinta l'um da Cuira. Ses bab era gia arbiter e d'uffant accumpagnava el fitg savens el durants ils gieus e ha fatg in pau l'assistent sin lingia dal bab. Sco paja survegniva el lura ina liongia ed ina bavronda. Uschia è la passiun per l'arbitrar naschida tar l'um ch'è oz betg mo arbiter, mabain er anc persuna responsabla per ils arbiters dal chantun Grischun.
Cun pulita luschezza di Max Kressig, ch'el haja gia tschivlà sin mintga plaz en il Grischun gieus da campiunadi. Davent da Sedrun fin a Poschiavo haja el vis tut las plazzas e tut las cabinas. La gronda part dals gieus durant ils ultims 14 onns sajan stads bels gieus, natiralmain adina puspè cun bleras emoziuns, ma darar sut la tschinta.
Sulettamain al cumenzament da sia carriera haja el gì a Cuira in gieu da 5avla liga, nua ch'el haja studegià suenter il gieu da bittar la fautsch en chanvà. Giugaders hajan affruntà el a moda persunala e quai saja stà dir. Oz guarda l'um che lavura sco manader da project en la branscha electrica, enavos fitg reflectà sin quest eveniment.
Jau sun vegnì entras il tschivlar ina pli ferma persuna.
Ina «aventura» da Max Kressing sco arbiter ha schizunt cuntanschì pli che 120'000 clics sin YouTube.
Var 40 onns da viadi cun ses tschivlot
Per Andi Valaulta (72) da Rueun è l'arbitrar stà durant bun 40 onns ina gronda passiun. Dal 1971 fin il 2013 è l'um cun ils chavels alvs ed il schnuz lung alv stà da vesair quasi mintga fin d'emna sin in plaz da ballape en la Svizra Orientala. Durant quest temp hajan els tschivlà radund 700 gieus da campiunadi u da cup. E l'um ch'è anc adina da chattar mintga fin d'emna sin in plaz da ballape sco fan, di ch'el saja adina stà in ami dal ballape e mai in arbiter che vuleva chastiar ils giugaders. Durant sia carriera sco arbiter haja el forsa repartì 30 cartas melnas e maximalmain tschintg cotschnas.
Sche Andi Valaulta guarda enavos sin ses temp sco arbiter, sto el savens rir. La federaziun na saja betg vegnida ritga cun el, cunquai ch'el haja repartì mo darar cartas.
Muments pli hectics durant ses 700 gieus? Haja schon er dà. Dentant hai darar dà muments ch'èn ids sut la tschinta. Inqualin ha gì pli gugent mai ed inqualin in zic pli pauc.
Fridas hani mai fatg amogna, ma cuntents n'èn ils giugaders betg adina stads.
Malgrà ch'el n'è dapi 10 onns betg pli activ sin la plazza, è Andi Valaulta anc oz ina persuna enconuschenta sin ils plaz da ballape en il Grischun. Anc oz auda el savens ils pleds «l'arbiter è lu era qua» cu el è a guardar in gieu da ballape regiunal. Per il Sursilvan sajan quests pleds in'onur.
Nus dain in cuc davos las culissas, explitgain e mettain en context, sajan quai fenomens novs, u istorgias pauc enconuschentas.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
