Armin Duff maina dapi bun quatter onns il svilup da l’exposiziun dal Technorama a Winterthur ch'è in dals pli gronds centers da la scienza en l’Europa. Plinavant è il fisicher sursilvan er vice-directur dal Technorama e responsabel per la didactica.
Jau na vuleva mai ir a scola. La finala sun jau ì 20 onns a scola e daventà fisicher.
Creschì si è Armin Duff sin in bain puril a Sumvitg. Gia sco uffant ha el adina experimentà e zambregià. Cun dastgar lavurar oz en il Technorama saja uschia in siemi ì en vigur, di il fisicher sursilvan da 43 onns. A chasa a Winterthur zambregia ed experimentescha Armin Duff cun ses dus figls.
Swiss Science Center Technorama
La musica na dastga betg mancar
Dasper la famiglia e sia lavur fa Armin Duff gugent musica. Pli baud ha el sunà il cornet en la societad da musica Sumvitg/Cumpadials. Ed il cornet è anc oz ses instrument preferì. Durant il temp al gimnasi a Mustér ha Duff er chantà tar ils Cantins, in chor sut la batgetta d’Ursin Defuns. Ed er durant ses nov onns en Spagna ha la musica giugà in’impurtanta rolla. Plirs onns ha el fatg part a la band «The Freak Fandango Orchestra», ina maschaida da musica tranter folk, polca, gypsy e punk-rock. Oz batta ses cor dentant plitost per il stil da jazz.
