Arno Cresta - Tranter antiquitads e libertad

Sia individualitad haja da far bler cun sia tenuta da vita. «Esser avert per tut e mintga persuna» saja ses motto da vita. Auters vesan quai forsa sco originalitad, per el saja quai dentant gia adina stà uschia: viver e laschar viver. E perquai è era sia atgna libertad in grond tema per l’um da 63 onns. Metter sia matratscha en l’auto e simplamain ir insanua. Il lieu preferì è Venezia. En il Grischun è Arno Cresta il pli gugent a Ziteil – in lieu che dat forza ed energia ad el. Ed uschia lavura el er energetic. In dun che saja gia adina stà en el, ch'el haja dentant scuvert per propi ils davos onns.